Шеснаестгодишната Џени Линд е киднапирана сред бел ден додека се враќа од училиште. Однесена е во запуштена куќа, каде што таа и другите киднапирани девојки се соочуваат со ужаси што ги надминуваат нивните најлоши кошмари. Иако очајно сакаат да избегаат, нивниот чувар го спречува секој можен обид за бегство. Времето минува, исчезнувањето на тинејџерката паѓа во заборав, па дури и нејзините родители повеќе не се надеваат на добри вести.

Пет години подоцна, телото на Џени е пронајдено обесено на игралиште. Нема докази, само еден сведок – маж кој не се сеќава што точно видел. Почнуваат да се појавуваат тела на млади девојки убиени на најсурови начини. Комесарот Јона Лина е единствениот што се сомнева дека сите убиства носат ист потпис и ги крши процедурите за да се обиде да го пронајде и запре крвожедниот психопат скриен зад невина маска.