Оваа книга може да се прочита во еден здив, да се проголта, но нејзината содржина уште долго останува несварена во нас. Навидум ситните случки, раскажани со поетски, дури и надреалистички реченици, полека ја плетат приказната раскажана од една ученичка, со малку зборови но многу метафори, за нејзината врска со возрасен маж, заедно со сѐ што повлекува таа врска и што засекогаш ќе промени најмалку еден живот, еден светоглед.

„Гневот во рамките на литературата не го сметам за негативен, тој за мене е продуктивна емоција. Тагата да, тагата е негативна, тагата води кон пасивност и не можеш ништо со тоа да направиш освен полека да се бориш да се ослободиш од неа на сите можни начини. А, гневот е стимул за делување. Да се лутиш, значи да сакаш нешто да промениш, да создадеш.“ - Никол Хохолцерова